تصور ان موقع متخصص في التوعية المجتمعية قدر يضاعف زاور موقعه من 200 الي 6000 في يوم واحد يعني زيادة مقادرها 30 ضعف عن طريق انه يعمل كويز بسيط من 6 اسئلة
عشان كدا في الفيديو دا ان شاء الله هشرحلك بالخطوات ازاي ممكن تقدر تضاعف زوار متجرك الإلكتروني أو البزنس بتاعك اون لاين مهما كان عن طريق الإختبارات
نبدأ باسم الله
التسويق عن طريق الاختبارات او quezz marketing
يعتبر من الطرق اللي مش واخدة حقها عند رواد الاعمال أو اللي شغالين في التجارة الالكترونية عموما. فمثلاً تعتبر طريقة أقل من تكلفة اعلان سناب شات. الفرق الوحيد بينهما هو السهولة والسرعة
فايدة التسويق عن طريق الاختبارات انك بتقدم للعميل وقت سعيد وتجربة ممتعة بالنسبة له وفي المقابل بتحصل منه علي معلومات مجانية عنه .. المعلومات دي هتقدر تستخدمها بعد كدا في اقناعه انه يشتري منتجاتك
أولا : الاختبار يبدأ بعنوان
** في دراسة عملتها مركز ابحاث ساينس بوست و نشرتها واشنطون بوست سنة 2016 ان 70% من مستخدمي الشبكات الاجتماعية بيتفاعلوا مع الخبر من عنوانه بدون قراءة التفاصيل
صحيح هو خبر صادم للمدونين لكن بيبن لنا اهمية صياغة العنوان بطريقة جذابة
عندنا 3 انواع من العناوين اللي هتقدر بيها تشد انتباه عميلك
النوع الأول اللي هيكون
ايهما …… انت ؟
ناخد مثال … لو مثلا مشروعك مطعم
ممكن تستخدم عنوان الأختبار ” اختبر اي انواع المطاعم يناسب شخصيتك ؟
مثال تاني .. لو مثلا مشروعك متجر لبيع العسل
العنوان ممكن يكون ” اختبر نوع العسل الأنسب لصحتك !
هنلاحظ هنا ان النوع دا من الاختبارات بيخاطب احتياج الشخص انه يعرف أكثر عن نفسه … وكلنا كبشر نحب نعرف اكثر عن نفسنا …. افتكر معايا موقع صراحة اللي قدر ينتشر عالميا لانه كان مبني علي رغبة الانسان انه يعرف اكثر عن نفسه
النوع الثاني من عناوين الاختبارات الناجحة اسمه شخصية مشهورك المفضل
يعني ايه الكلام دا … ناخد مثال عشان نوضح الفكرة بشكل عملي
مثلا لو عندك متجر اون لاين لبيع النظارات
العنوان ممكن يكون
اي من نظارات المشاهير تناسب وجهك ؟
او مثلا لو بتبيعي فساتين اون لاين ممكن تستخدمي
أي من اطلالات المشاهير تناسب سهرتك ؟
هنلاحظ هنا ان النوع دا بيشتغل علي رغبة الانسان انه يكون في بينه وبين المشاهير صلة أو رابط … اغلبنا كدا … جرب بنفسك تقول لزميلك ان نظارته تشبة نظارة المشهور الفلاني وهشوف السعادة في عنيه
النوع الثالث.. اعرف حقيقة
لو مثلا بتقدم خدمة اون لاين … خلينا نقول مثلا انك محامي عنوان الاختبار ممكن يكون
هل تعرف حقيقة شهرة بعض المحامين ؟
أو مثلا لو انك مبرمج تطبيقات جوال
ممكن اختبارك يكون بعنوان :
هل تعرف الحقيقة وراء شهرة تطبيق كذا
النوع دا من الاختبارات بيركز علي رغبة العملاء في كشف المستور أو ان في سر خفي حد متخصص هيقولهم عليه
طيب كدا عرفنا انواع العناوين وازاي ممكن تستخدمها في خطتك التسويقية الجاية
النقطة الثانية …. صياغة الاسئلة
ضروري ان الاسئلة تكون قصيرة عشان عميلك ميحسش بالملل – استخدم من 5 الي 9 اسئلة هيكون كافي جدا ان العميل يكمل الاختبار وفي نفس الوقت هتكون عرفت عن عميلك معلومات قيمة وكافية انك تستخدمها لاقناعه انه يشتري منك
نوع الاسئلة ضروري يكون بسيط زي الاختيار من متعدد أو صح وغلط … متطلبش من العميل انه يكتب أو تسأل سؤال غير واضح …. افتكر ان هدفنا العميل يكون متحمس عشان يكمل معاك
استخدام الصور الجذابة … لما هتضيف صور للاسئلة دا هيخلي الاختبار ممتع اكثر و العميل مش هيحس بالملل
خلي اسئلتك شخصية وطبيعية … يعني كأنك بتكلم اخوك او صديقك دا هيخلي العميل يكون مرتاح اكثر انه يسيبلك بيانات التواصل معاه اسهل
تمام .. كدا خلصنا بنية الاختبار وعرفنا ازي نشد انتباه العميل وعرفنا ازاي نقدمله اختبار ممتع
نيجي بقي للشق الثاني … محتاجين بيانات العميل الشخصية
او بمعني اصح عايزين ناخد طريقة التواصل مع العميل اللي هنقدر بعد كدا نتواصل معاه باستمرار ونرسله عروضنا .. عايزين ايميل أو واتس اب العميل
هنتكلم عن الطريقة الاساسية وهي ايميل العميل
مع نهاية الاسئلة العميل هيشوف نموذج عبي بياناتك عشان توصلك نتيجة الاختبار
مثلا الاسم والايمل
أو الاسم ورقم الجوال
او حتي انه يدخل معاك علي فيس ماسنجر
او يضيفك علي سناب او انستقرام
حسب طبيعة كل نشاط هتقدر تحدد عملاءك ايه طريقة التواصل اللي تناسبهم وتعملها
لازم متطلبش بيانات انت مش محتاجها … يعني خليك مختصر ومركز عشان العميل يسجل معاك بأريحية
وكمان يفضل جدا انك تشجعه بهدية اضافية … يعني لو انت مقدم خدمة محامي او طبيب او مبرمج ممكن تكتب سجل لتعرض نتيجة الاختبار الخاصة بك وتحتها تكتب سوف تحصل ايضا علي استشارة مجانية
كدا انت حفزت العميل انه يسجل معاك بياناته … ودا هتقدر تتواصل معاه مدي الحياة مجانا وتعرض عليه كل جديد عندك بدون اعلانات سناب شات ولا غيرها
طبعا اخلاقيا لازم توضح كويس انك هتتواصل مع العميل باستمرار عشان العميل ميحسش بالانزعاج ودي ممكن تقولها بطريقة مهذبة
زي مثلا
سجل لتعرض نتيجة الاختبار
سنرسل لك ايضا كل جديد
أو اي صيغة ثانية تشوفها مناسبة حسب نشاطك لكن المهم انك تكون امين مع العميل ومش بتخدعه
دلوقتي جت اللحظة اللي عميلك مستنيها … نتيجة الاختبار
بمجرد العميل مسجل بياناته معاك هينتقل لصفحة نتيجة الاختبار وهنا يهمنا جدا ان الصفحة اللي هيشوفها حتكون ملهمة بالنسبة له وبالتالي يعمل لها شير عشان اصدقاؤه يشوفوها ويوصلك عملاء جدد عن طريقه
وهنعرف ممكن نعمل دا ازاي
** اولا استخدم صورة جذابة
فاكرين المثال بتاع متجر النظارات : هنا ممكن يحط صورة شخصية المشهور وهو لابس نظارة
يعني هنا خلينا الشخص يجاوب علي مجموعة اسئلة عن نفسه اللي هتوصله انه يشوف اجابته بالصورة وكمان ربطناها بشخصية مشهورة هو بيحبه
ثاتي حاجة ممكن نعملها عشان نصمم نتيجة اختبار مشجعة علي الشير هي ان النتيجة تكون أمينة وايجابية في نفس الوقت
النتيجة الإيجابية بتدعم الرغبة في الشير لانها هتخلي الشخص يبدو بصورة كويسة قدام اصدقاؤه او متابعينه علي السويشال ميدا …. ودا بدوره هيشجع ناس جديدة انها تدخل الاختبار
والنتيجة الأمينة الشخص هيتقبلها ويصدقها وهيعرف ان الاختبار دا واقعي وبالتالي هيسهل عليك اقناعه بعد كدا انه يشتري منك
في صفحة عرض النتيجة تحديدا ممكن تذيل الصفحة بروابط منتجاتك المهمة لأانه التوقيت دا تحديدا هيكون مناسب انك تعرض عليه الشراء من متجرك او طلب خدماتك …. هنخلص الكلام عن الكويز وبعدين هقولك تعمل ايه مع الناس اللي مش هيشتروا من المرة الأولي والطريقة الصحيحة للمتابعة معاهم
نرجع دلوقتي لتسلسل الافكار ونتكلم ازاي نعمل الانطلاقة الاولي للكويز
طبيعي جدا انك تنشر الكويز علي حسابااتك علي السوشيال ميديا انستقرام او سناب او فيس بوك لكن خلي بالك … ضروري تستخدم صورة جذابة او فيديو جذاب مع البوست
انصحك تجيب 3 او 4 صور ومن خلال تطبيق كانفا تقدر تحولهم لصورة متحركة مدتها 9 ثواني أو حتي اقل وتستخدمها مع البوست
ممكن تعمل تمويل للبوست بمبلغ بسيط عشان توصل الكويز لعدد اكبر من الناس وتكون دي الانطلاقة القوية …. لو مركب اكواد التتبع في متجرك او موقعك هتكون فرصة انك تظهر اعلانك الممول الخاص بالكويز علي الاشخاص اللي زاروا المتجر خلال ال 30 يوم اللي فاتوا وهتبقي فرصة انك تعمل متابعة لزوار متجرك السابقين
وبمناسبة المتابعة مع العملاء عايزين نعرف هنعمل ايه مع الناس اللي سجلوا معانا بياناتهم وازاي هنتابع معاهم لغاية منحولهم من مجرد مشتركين الي عملاء حقيقين
لو هتطب منهم رقم التواصل واتس اب فهتقدر تتواصل معاهم عن طريق البرودكاست … وانصح انك تكون بتستخدم واتس اب بزنس مش الواتس الشخصي لانك حتلاقي فيه اوبشنز زيادة حتفيدك في تنظيم عملية المتابعة
بس ضروري تتأكد ان العميل يسجل رقمك عشان تضمن ان رسائل البرودكاست حتوصله وإلا هتتضر تتواصل معاهم يدوي واحد بواحد ودي هتكون عملية مرهقة جدا خصوصا لما عدد المشتركين يزيد ..
لكن لو هتطلب من العميل بريده الالكتروني فلحسن الحظ الموضوع هيكون أسهل في التنظيم خصوصا مع وجود ادارة البريد الالكتروني المجانية زي ميل شيمب أو غيرها اللي ممكن من خلالها تحدد ان ارسال الايميلات يكون تلقائي بدون تدخل يدوي منك
وفي الحالة دي انصحك انك تحدد ارسال اول ايميل تلقائي بمجرد اشتراك العميل … ودا حيفيدك انه يأكد علي العميل اشتراكه وهخليه مؤهل انه يفتح ايميلاتك المستقبلية … ممكن تخلي الصيغة مثلا انك بتشكره علي الاشتراك معاك وانك هترسله ايميلات مفيده مستقبلا
بعد يومين ثلاثة … ممكن ترسله تفاصيل اكثر عن نتيجة الاختبار اللي عمله مثلا احصائيات او اي معلومة تخليه يفتكر الاختبار ووفي الايميل دا تحديدا ممكن تطلب منه مرة ثانية انه يرسل او يشارك الاختبار مع اصدقاؤه
بعد اسبوع مثلا ممكن ترسل له اراء بعض العملاء السابقين اللي اشتروا منك أو قصص نجاح للناس اللي جربوا خدماتك في حل مشاكلهم
انت كدا بتبني جسر من الثقة بينك وبين العميل … لاحظ انه في البداية شدينا انتباهه وخليناه يعرفنا وبعد كدا طلبنا منه انه ينشر نتيجة الكويز عشان يحس بالفخر علي السوشيال ميديا ومعاها الاختبار يوصل لناس جديدة معانا وبعد كدا في الايميل الثاني طلبنا منه يساعدنا في نشر الكويز مرة ثانية وحاليا بنؤكد معاه اننا جديرين بثقته وبنعرض عليه تجارب اشخاص اشتروا منك وسعداء بالفعل
عند المرحلة دي تحديدا المشترك اصبح مؤهل تماما انه يشتري و يتقبل منتجاتك وانك ترسل له كود الخصم او ترسله احدث منتجاتك وممكن تستمر في ارسال العروض كل اسبوع رسالة بدون ازعاج …. وبين كل فترة وفترة ترسل معلومة مفيدة او شئ مسلي للعميل
في النهاية بتمني انك تكون استفدت من الفيديو .. ولو عندك اي استفسار أو تجربة مشابهة قولهالنا في التعليقات عشان الناس تستفيد أكثر
ومتنساش تعمل اشتراك للقناة ولايك للفيدو وشير لأصدقاءك